സദാചാര ആർപ്പുവിളികൾ

   

കൂടെ നടക്കാൻ ഒരുപാട് കൊതിച്ചു,

പ്രണയത്തെ പ്രണയം എന്ന വാക്കുകൊണ്ട്-

എഴുതാൻ ശ്രമിച്ച നാളുകൾ.

വാക്കുകൾക്കും നോട്ടങ്ങൾക്കും പിടി നൽകാതെ,

അവളെ ജീവിതാവസാനം വരെ, 

സ്വന്തമാക്കാൻ പരിശ്രമിച്ച നാളുകൾ.

ഒടുവിൽ സദാചാര ഭീഷണികൾക്കു-

മുന്നിൽ അതും നിലച്ചു.

പ്രണയത്തെ അവർ മൂർച്ചയുള്ള 

ആയുധം കൊണ്ട് കീറിമുറിച്ചു.

ഒപ്പം ഞങ്ങളുടെ സ്വപ്നങ്ങളെയും.

മരണം  ഞങ്ങളെ കീഴടക്കിയപ്പോഴും

മറ്റൊരു ലോകത്ത് ഞങ്ങൾ ഒന്നിച്ചു.

സദാചാര ആർപ്പുവിളികൾ ഇല്ലാത്ത,

പൊയ് മുഖങ്ങളില്ലാത്ത,

സ്വപ്ന സുന്ദര ലോകം.

അപ്പോഴും ഞങ്ങൾക്കവരെ-

കാണാമായിരുന്നു, കേൾക്കാമായിരുന്നു.

അടുത്ത ഇരകളെ തേടിയുള്ള

അവരുടെ ആർപ്പുവിളികൾ.

മരണത്തിനെങ്കിലും ഞങ്ങളുടെ പ്രണയത്തെ-

മനസിലാക്കാൻ കഴിഞ്ഞെന്നോർത്ത്

ഞങ്ങൾ പറന്നകന്നു... 

ഞങ്ങളുടെ മാത്രമായ ലോകത്തിലേക്ക്............

                     

                                                   - സഞ്ജയ്‌ ജയകുമാർ 

മടക്കയാത്ര

മണ്ണിന്റെ മണമുള്ള ജലകണങ്ങളായിരുന്നു
ഓർമ്മകളിലെ എന്റെ മഴക്ക്.
പല തുള്ളി പെരുവെള്ളമായി മാറുമ്പോ
കടലാസു തോണിയേറി മറുക്കര തൊടുന്ന
ബാല്യകാല ഓർമ്മകൾ.

നിറഞ്ഞൊഴുകുന്ന തോടുകളും കുളങ്ങളും

കിളികളാരാവങ്ങളും കൊണ്ട്
മനോഹരമായ സുപ്രഭാതങ്ങൾ.

ബാല്യകാല കൗതുകമുണര്ത്തിയ-
മഴയുടെ ഉത്ഭവം കാണാൻ മാനം നോക്കിയിരിക്കുമ്പോ-
കാഴ്ച വട്ടം മറച്ച് പച്ചമര കുടകളും
പച്ചില കൂട്ടത്തിൻ ഇടയിലൂടെ
ഏഴു നിറങ്ങളിൽ മഴവില്ലും.

സുന്ദരമായ ഈ ലോകം കൌതുക-

മായി തോന്നിയ നാളുകൾ.

കാലം മാറി കഥമാറി മനുഷ്യർ മാറി
പണത്തിനു പുറകെയുള്ള ഓട്ടപാച്ചിലിൽ
പ്രകൃതിയോടുള്ള സാമീപ്യവും മാറി.
ഇന്ന് മഴയെവിടെ പച്ചമര -
തണലുകൾ എവിടെ..
എവിടെയും കൂറ്റൻ കെട്ടിടങ്ങളും
ഉറുമ്പിൻ കൂട്ടം കണക്കെ വാഹനങ്ങളും.

ഇന്നെന്റെ മഴയ്ക്ക് പുതു -

മണ്ണിൻ ഗന്ധമില്ല മനോഹാരിതമില്ല.

പ്രകൃതിയെ മനുഷ്യൻ നശിപ്പിക്കുമ്പോൾ
മനുഷ്യനെ പ്രകൃതി നശിപ്പിക്കും-
കാലം വിദൂരമല്ല.
അന്ന് പ്രളയവും, താപവും -
മനുഷ്യനെ തളർത്തും.
പ്രകൃതിയുടെ പ്രകൃതിയിലേക്ക്
തന്നെയുള്ള മടക്കയാത്ര……………………

                                            – സഞ്ജയ്‌ ജയകുമാർ